I le faai’uga o le vaiaso talu ai sa faamautū mai ai le atoaga o le galuega tele ma le umi a malu o le malō ma le ofisa o tiute, lea na faamaonia ai taofia ma pu’e faapagota ai o ni tagata, ma le maua ai o ni laau malosi, o fualaau faasāina ma tino i tupe e lata i le 11 miliona tālā Niu Sila.
O se galuega na faatino e ala i le tele o osofa’iga na faatautaia i Aukilani ma Waikato i le vaiaso talu ai.
O lea galuega ua ta’ua o le Operation Mexted na aga’i tonu i le tele o gaioiga faasolitulafono o loo maitauina le tula’i mai i itu tuaoi, e pei ona māua ai le tele o fualaau faasāina o le ‘aisa, le methamphetamine ma le mariuana o loo aumai faananā i totonu o Niu Sila.
Ma e faamauina o le galuega lona 29 lea i faitauga o galuega tetele e taofia ai le mafai ona oo mai o nei fualaau faasāina mai le oo mai i totonu o le atunuu talu mai le tausaga e 2016.
I ripoti e faapea, o le vaega muamua o lenei galuega sa amata mai le masina o Iuni, lea na maua ai ni laau malosi, poo fana i lona ituaiga Glock pistols e 4 ma se fana o le submachine gun i se fale mautotogi, i Mangere Bridge Airbnb.
O lea na pu’e faapagota ai ni tagatānuu Amerika.
O isi osofa’iga na faatino i le masina o Aokuso ma Setema, lea na maua ai le faitau afe o tupe, ma isi laau malosi, ma le pauta faasāina o le methamphetamine, ua fuafua e tufatufaina atu.
O le aso 18 o Setema, na faatino ai e leoleo ma le vaega o tiute o sa’ili’iliga ma osofa’iga e faaaogā ai pepa faataga i le 10 o nofoaga i Aukilani ma Waikato, o lea na taofia ma pu’e ai le to’a 7 o tagata o loo aafia i lenei matāupu.
I le aotelega o osofa’iga, o loo masalomia ai le aumai ai e nei sui o le vaega poo le syndicate o le 18 kilokalama o le ‘aisa, poo le meth, ma le tele o laau mariuana a se ituaiga vailaau o le resin.
O le to’asefulu o ia tagata o alii e mai le 23 tausaga aga’i le 39 tausaga le matutua, ma le tama’ita’i e to’atasi e 33 tausaga le matua – o loo faamaonia mai le tele o moliaga ua aafia ai, e aofia ai moliaga o le umia o laau malosi, o le aumai i totonu o le atunuu ma le agaga tufatufaina atu o fualaau faasaina, o faia o gaioiga e aofia ai le faaaogāina o tupe palapalā ma le auai i faatasiga ma le loto e faatino soligatulafono poo le vaega ua ta’ua o le organised criminal group, e iai le naunauta’iga foi e faatupuina vevesi.
Puna o Faamatalaga: https://www.rnz.co.nz/news/national/573704/woman-who-died-in-police-custody-had-complications-from-chronic-drug-use-and-covid-19-infection
